كفتة مشوية ع الفحم :- ( نفس بتاعة الحاتي )
المقادير :
1 ك لحم احمر
250 جرام دوش ( عند الجزار قوليله دوش او بوش )
2 بصل مبشور ومصفي جيدا من المياه ( مترميش المياه)
نصف معلقة صغيرة بيكنج بودر
ملح
فلفل أسود
جوزة الطيب
للتقديم والتزيين :
بقدونس
بصل
ليمون
طريقة التحضير :-
تقطعي اللحم مكعبات مع البوش ونحطها في الثلاجة ساعتين وبعدها نطلعها ونفرمها ع الوش الواسع في المفرمة
ونضيف عليها طفل البصل المصفي من المياه جيدا والملح والفلفل الأسود و جوزة الطيب والبيكنج بودر وقلبها حلو اوي لحد ماكل المكونات تتجانس مع بعضها كويس
بعد كدة نفرمها مرة كمان في المفرمة ع الوش الاضيق من الوش الاولاني ولو مفيش يبقي نفرمها ع نفس الوش تاني
بعد ما نخلص الوش التاني نعجنها ( ندعكها ) اكنها حتة عجينة نفضل نعجن فيها لحد ماهتلاقيها عملت معاكي عرق يعني تحسي بقت مفتلة اول ماتوصلي للنتيجة دي يبقى احنا نجحنا ندخلها الثلاجة 4 ساعات عشان تتشمع
ومتفكش ع النار
بعدها نجهز الأسياخ ونشعل الفحم ونطلع الكفتة لتشكيلها او نشكها ع الاسياخ واحنا بنشكها فاكرة مياه البصل نبشر عليها حبة واحدة طماطم ونضيف شوية ملح وفلفل أسود ونبل ايدينا بيها عشان الكفتة متبقاش ماسكة في أيدي
ونضعها ع الفحم بعد فرشه في الشواية وظبط الحرارة
ونقلب لحين النضج ثم نضعها ع طبق التقديم الموجود به البقدونس والبصل الشرائح ونزين بشرائح الليمون
فراخ الحاتي المشوية بافضل تتبيلة واسهل طريقة والشوي على البوتاجاز واسرار ارز حضر موت والطعم مظبوط بجد
مقادير الفراخ
هاتي فرخة في حدود كيلو ونصف
ملح
فلفل
بصلة كبيرة مبشورة
طماطمية مبشورة
م. صلصة نوع كويس علشان بيفرق في الطعم خل
هنتبل الفراخ
بالبصل الاول ونسيبه نصف ساعة ثم نضع بقية المكونات الخل والطماطم والصلصة وملح وفلفل ونتركهم ساعتين ثم نحضر الشواية اللي في الصور ونسخنها كويس جدا ثم نضعها علي البوتاجاز الي ان تسخن جدا ثم نضع الفراخ تأخذ صدمة وتلون ثم نقلبها الناحية الاخري الي ان تأخذ لون ثم نوطي عليخا ونغطيها الي ان تستوي ونخرجها عاى بقدونس وتقدم
ارز حضر موت
نصف كيلو ارز بسمتي
لكل كوب ارز
م. ص كاري
نص .م.ص كركم
لكل كمية الرز
٤ حبهان
٥ قرنفل
عود قرفة
شوربة
بصلة صغيرة مفرومة
الطريقة ننقع الارز لمدة نص ساعة
نضع سمن وزيت على النار ثم ننزل بالبصل تقلبتين الى ان يصبح البصل شفاف ثم نضع التوابل ثم الارز والشوربة اوالماء ويمكن وضع مكعب مرق بيعزز الطعم ونترك الارز يستوي ثم نحضر فحمة ونقفلها بمعلقة سمنة ويقدم بالف هنا
كفته الفراخ
المقادير
كيلو صدور و اوراك فراخ مخليه
بصله مفرومه ناعم ومتصفيه كويس
بقدونس مفروم ناعم
معلقه كبيره زيت
معلقه صغيره فلفل احمر رومي مفروم
معلقه صغيره من بصل باودر بابريكا وتوم باودر والملح والفلفل الاسود وبيكينج باودر وبهارات فراخ
كميه الصدور اد كميه الاوراك يا اما تستبدلي الاوراك بالدهن لكن اوعك تعمليها صدور لوحدها هتنشف منك
هتفرميهم كويس وتضيفي كل المقادير عليها وتعجنيهم مع بعض كويس تسبيها ترتاح ف التلاجه مش اقل من نص ساعه وبعدين تشكليها ع اسياخ الشيش طاووق وتحطيها ع ورق زبده او صينيه مدهونه زيت وبعدين تدخليها فرن ساخن من ٣٥ل٤٠ دقيقه ودوقي ألذ واطعم كباب فراخ ف الدنيا
تعديل
مايه البصل الي صفيناها حطي عليها معلقه زيت وانتي بتشكلي الكفته تبلي ايدك بيها كده هندي اللون الحلو ده وكمان بعد نص ساعه من التسويه لمعي الكفته بالخليط ده هيخليها طريه وبتلمع حلو اوووي
